मुंबई : भारतीय संरक्षण दलांच्या परीक्षांसाठी प्रशिक्षण देणाऱ्या मुंबईतील सेंचुरियन डिफेन्स अकादमी या सेंचुरियन एज्युकेशन प्रा. लि. च्या संरक्षण विभागाने वर्ष २०२०साठी ‘शिशिर रामेश्वरम नॅशनल टॅलेंट हंट’ची (एसआरएनटीएच) नोंदणी सुरू केली आहे. संरक्षण दलातील अधिकारी बनण्याची इच्छा असणाऱ्या उमेदवारांना शैक्षणिक मार्गदर्शनासह त्यांना आर्थिक पाठबळ देणे हा या शिष्यवृत्तीमागील मुख्य उद्देश आहे.
हा एक राष्ट्रीय स्तरावरील शिष्यवृत्ती कार्यक्रम असून, संरक्षण दलातील अधिकारी बनण्याची क्षमता असणाऱ्या देशभरातील उत्कृष्ट उमेदवारांचा शोध याद्वारे घेतला जातो. या शिष्यवृत्ती परीक्षेसाठी अर्ज करण्याची शेवटची तारीख १८ डिसेंबर २०१९ ही आहे. अर्जदारांच्या सोयीसाठी व सुविधेसाठी ही परीक्षा १५ राज्यात घेण्यात येणार आहे. जम्मू आणि काश्मीरमध्येदेखील एक परीक्षा केंद्र ठेवण्यात आले आहे.
या शिष्यवृत्तीकरिता महत्त्वाची पात्रता म्हणजे विद्यार्थी भारतीय नागरिक असला पाहिजे आणि कोणत्याही बोर्डातून दहावी, बारावी किंवा कोणत्याही विषयात पदवी अभ्यासक्रम करत असला पाहिजे. इच्छुक उमेदवार
www.defenceguru.co.inकिंवा
www.centuriondefenceacademy.com पैकी कोणत्याही संकेतस्थळावर १०० रुपये नोंदणी शुल्क भरून नोंदणी करू शकतात. नोंदणी झाल्यावर त्यांना याच वेबसाइटवरुन दोन आठवड्यांत प्रवेश कार्ड मिळेल.
शिष्यवृत्ती परीक्षेत हे सर्वोत्तम दहा विद्यार्थी अल्फा वर्गात येतील व त्यांना नोंदणी शुल्क, ट्यूशन फी आणि अभ्यास साहित्यात शंभर टक्के सवलत मिळेल. त्यानंतरचे २० विद्यार्थी ब्राव्हो वर्गात येतील व त्यांना ट्यूशन फीमध्ये ९० टक्के तर, अभ्यास साहित्यात शंभर टक्के सवलत मिळेल.